Cafgu detachement sinalakay ng BIFF sa North Cotabato at nagpasabog pa ng IED

ALEOSAN, North Cotabato – Sinalakay ng limampung mga miyembro ng Bangasamoro Islamic Freedom Fighters (BIFF) ang detachment ng Citizen Armed Forces Geographical Unit (CAFGU) sa probinsya ng Cotabato dakong alas 10:15 kagabi.

           Ayon kay Cotabato Police Provincial Director Ssupt Alexander Tagum na sinalakay ng BIFF ang detachment ng Cafgu sa ilalim ng 38^th Infantry Battalion Philippine Army sa Barangay Pagangan Aleosan North Cotabato.

           Tumagal ng sampung minuto ang palitan ng bala sa magkabilang panig.

          Umatras ang mga rebelde nang dumating ang karagdagang pwersa ng militar na tumulong sa mga Cafgu.

           Sinabi naman ni Aleosan Chief of Police, S/Inspector Jun Napat na bago ang pagsalakay ng mga rebelde sa Cafgu Detachment ay nagpasabog pa ito ng Improvised Explosive Device (IED) sa gilid ng National Highway.

           Naiwan rin ng BIFF ang isang handheld radio at isang IED na kusang pinasabog ng EOD team ng Philippine Army.

          Walang nasugatan sa pagsabog at pagsalakay ng BIFF ngunit nagdulot ito ng takot sa mga sibilyan.

          Sa ngayon ay nasa hieghtened alert ang militar at pulisya sa North Cotabato sa posibling diversionary tactics ng BIFF na patuloy na tinutugis sa Maguindanao. By: Gemma Roda